सद्गुरू आणि अनंत

अंत न लागे अनंताचा
लिनता, नम्रता न अंगी बाणे
एकच मार्ग उरतो आता
शरण तयासी जाणे ||

शरण तयासी जाण्याचा
मार्ग दाखवी सद्गुरू
उपदेशाची अमृत वाणी
स्वामी मुखातून उच्चारू ||

उच्चारता नाम तयाचे
गळून पडतील पातके
सद्गुरू आणि अनंत हे
एकच तत्व इतुके ||

स्वामी हा तिन्ही जगाचा
नामातच असे सामावलेला
नाम मुखी घेता तयाचे
जन्म सार्थकी लागेल अमुचा !!!
..........मयुर तोंड़वळकर.........

शरण जाता श्री सदगुरूशी.......

कोण रक्षितो गर्भामधे...?
कोण पुरवितो तेथे वारा...?
कोण निर्मितो बाळासाठी
जन्माआधिच अमृत धारा...?

कोण छेडीतो श्वासांमधे...?
प्रभूस्मरणाच्या मंजूळ तारा,
कोण निर्मितो नाद अनाहत.....?
ज्याने उजळे मनगाभारा.

उजळविण्याला मनगाभारा
कोण चेतवी अंतरज्योती...?
करण्या निशिदिन स्मरण प्रभूचे
कोण देतसे अखंड स्फुर्ती...?

कोण घडवितो वटवृक्षाला..?
कणा येवढ्या बिजामधूनी,
कोण देतसे फळांस गोडी..?
जिवन सोशून मातीमधूनी.

कोकिळ कंठी कोणी दिधले..?
गंधर्वांचे अपूर्व देणे,
वसंत येता आम्रतरूवर
कोण फुलवितो त्याचे गाणे..?

कुणी रेखिले मोरपिसावरी..?
रंग रेशमी इंन्द्रधनुचे,
मेघ बरसता गर्द वनामधे
कोण नाचतो त्याच्या संगे..?

निद्रेतूनही नयनांमधे
स्वप्न होऊनी कोण जागतो..?
सुखदु:खामधे हृदयी राहून
कोण अखंडीत सोबत करतो..?

कोण..? कसे..? या प्रश्नापाठी
आयुष्याची संध्या होते,
शरण जाता श्री सदगुरूशी
मग कर्त्याची ओळख होते.

"कर्ता एक रघुनंदन" हे
शरणांगत होताच उमगते,
प्रश्न मनीचे विरून जाती
एक तत्व हे मनी प्रगटते.

सद्गुरुकृपेच्या ऋणातुनी या
कोण कसे होईल उतराई,
हात मस्तकी सदैव वत्सल
जैसा ठेवत असते आई...

Courtesy: WhatsApp/Internet/unknown author
 🙏🙏🙏🙏